ليه بتِتْكاتْروا علينا؟
ده اْحْنا أَهُو بْنِحْلَمْ يَدّوبْ!
مِش بِداية حِلم فينا؛
تِزْرَعْ الخوفْ فـِ القُلوبْ!
ع العموم دُمتُم وشُكراً
بيكوا اْهُو عْرِفنا انتو مين!
الخِطَطْ مَفقوسَة جِداااً
وإحْنا مش هنقول آمين!
فاللي عاوِز فيكو يُغْدُر؛
واللي فاكِر نَفْسُه أذكى..
يلا مشْ لازِم يِفَكّر!
هيّ مش مِستاهلة حَبْكَة!
خوِفونا بسُرْعة مِنّا؛
وإعْمِلولْنا البَحْر قِشْطة!
إِنْتو خِيرَة وأَهْل جَنّة؛
واحنا عِيرَة، عْيَالْ أوّنْطَة!
إِقْفِلولْنَا البَوابـَــــاتْ؛
أُخنُقوا الحِلْم؛ اقتِلُوه!
عيشوا عَلى دَمْ اللي مَات؛
واللي عايش.. مَوِتُوهْ!
اللي بيخَافْ الحَيّاه..
مش حَرامْ إنُه يموت!
واللي فاتْ لَوْ عَدِناه؛
مش هَنِرْجَعْ لِلسُكُوتْ
فمَهْمَا كَتِفْتُوا إدينا..
مش
هَتِتْكاتْروا
علينا!
• • • • •
ليست هناك تعليقات:
إرسال تعليق