2012-08-22

إنت.. مش لايِق عليك!!


المصيبة لمّا إنك..
تِبقى أكبَر خْيبة فيك!
إختِلافَك كُلُه عنك؛
وإنت.. مش لايِق عليك!!

اللي "كُنتُه" هُوَ إنت؛
ولا "بِتكون" مِن جديد؟
عُمْر قلبك كله عَدى
ولّا لِسّة يَدوب وَليْد؟

تِبقى مين وِسْط الخَلايِق؟!
قُلي.. صِفَتَك إيه قُصَادَك؟!
"عِشْت".. بِتزَوَقْ حَقايق؛
"مُتّْ".. مش عارف مَصَابَك!!

باينة ضِحْكاتَك تَمَّلي؛
بس من جُواك شاقييييك!!
رُد وبصراحة قلي..
تعرف إيه "مِنَك" و"فيْك"؟

وإنت.. مش لايِق عليك!!

كُلَهَا بإيدَك جروحَك؛
وإنْتَ أسباب العَذاب!
صَدْمَة لما تلاقي روحَك؛
عاجزة جوه "غلاف شباب"!!

والمُخيف إن اللي شَابَك..
فَقر غِيَّة، وقُصْر شُوف!
كان ياريت كل اللي نابك؛
شالتُه "شماعة الظروف"!!

عِشت تهرب من خيالَك؛
لو لمَحْتَك مَرررة جيت!
فَجْأة تِسأل.. كَنْت مالَك؟
سبت نفسك ليه ومِشيت؟!!

ضِعْت وإتْشوِهْ كَيَانَك..
بس لِسّاك مُش ناسيك!
تُهت منك.. جيت مكانك؛
شَخص كان حِلْمُه يلاقيك؛
بس..
مُشْ لايِق عليك!!