2010-07-26

حين نتشبث بحلم قاتل!!!






جَمِيْلـٌ أَن يَكُوْن لِكُل مِنَّا حِلْم يَتَمَسَّكـ بِه، وَيُحَاوِل الْوُصُول إلَيه
وَلَكِن.. أَحْيَانا تُخْبِرُنا الْحَقِيقَة بِأَن نتَخَلَّى عَنْه، وَتُؤَيِّد ذَلِك جَمِيْع الْشَّوَاهِد..
عِنْدَهَا.. وَحِيْن نُدْرِكـ أَنَ تَمَسَّكْنَا بِه لَن يُؤَدِّي بِنَا الَا لِلْفَشَل، وَلخَسَارَة مَا تَبَقَّى مِن أَحْلَام...
لَابُد أَن نَتَوَقَّف مَع أَنْفُسِنَا قَلِيْلا
فَيَا مَن تَتَمَسَّكـ بِحُلْم مُسْتَحِيْل،، وَتَتَبُّع صَوْت نَفْسَك فَقَط...
احْذَر.. فَحُلْمُكـ بِيَدِه قَتَلَكـ
!!!!


الــــوقتُ كانَ ولم يـــزلْ
ثُقــــلاً يحركهُ المـــــللْ..
لا تـــــرتجي بعثَ الأمــلْ
في قلبٍ عاش على طـللْ..
عن موتِ الشعورِِ فلا تسَلْ..
لا تُخمَــد نــاراً لم تشتعِلْ!!
لا تنتظـــرْ.. هيا ارتحــلْ
ولأمرِ بُعـــدك فامتثــــلْ..
يكفي خيال.. يكفي هـزلْ!
لا ترثي حلمـــاً قد قُتـــلْ..
فالميت يُزعج من كلــــلْ..
كغريق شكـــــواه البللُْ!!!

تأبى الوصــــولُ على مهلْ
وتهرْوِلـُ... فتطولُ السُبُلْ!
ماذا أخذتُ من العَجَـــلْ؟!

أفبــــــعد كل ما حصــــلْ
مازلت تمضي بالأمــــلْ؟
أومِن جديـــــدٍ تستهــِـلْ؟!
هذي النهايــــــةُ.. فلتمِلْ
دِع عنكـ أمــــل مُفتَعـَـــلْ

لا تنتظـــرْ.. هيا ارتحــلْ
ولأمرِ بُعـــدك فامتثــــلْ..
يكفي خيال.. يكفي هـزلْ!
لا ترثي حلمـــاً قد قُتـــلْ..
فالميت يُزعج من كلــــلْ..
كغريق شكـــــواه البلل!!!

2010-07-24

حـــــلم،،



حلمُ رسمَتْه بجنوني خيالاتي..
عشقته.. دعوته اجمل حكاياتي..
بالواني واقلامي وريشاتي،،
نقشته على جدار امنياتي..
فجأة.. تتوقف ساعاتي..
يخدعني عمري.. قدري الآتِ..
وافيق على مشهد مأساتي..
في قمة مجدي وانتصاراتي
سُرقت مني افضل لوحاتي!!

2010-07-23

خــــــــــــرس!!



كان الحديث اكبر نفاق
كان كله كذب بيتفقس...
وقف الكلام جوه الحلوق
ولا صوت اذان ولا صوت جرس...
والصمت يقتل في المكان
وفي القلوب سيف ينغرس...
ومكنش بيهدّي النفوس
كان دوره شرير مفترس!!
فجأة العيون شافت أمل بعد انتظار
ومن بعيد جاي البطل راكب فرس....
داخل شجاع.. الله عليه.. فارس مغوار
فعلا جَسور.. عدى الحدود.. عدى الحرس...
اتلفوا حواليه يهللوا.. يشوفوا البطل
لقيوا البطل..
كان الخـــرس..
!!!

2010-07-20

شفت ف حلمي!



شفت ف حلمي اني سامحتك..
واني بحبك حب حقيقي..
واني انا نمت شوية ف حضنك
فنسيت همي.. ونسيت ضيقي..
ونسيت ضعفك.. ونسيت ظلمك
وانك بتبيعـــي وبتسيئـــي..
ولقيتني لو اتكدر منــــك..
امضغ كدري.. وابلع ريقي!!..
وانسى القسوة واخفف عنك..
وارجع اشوفك نور في طريقي..
والقى الغربة سابتني ف قربك..
ورجع اسمك يبقى صديقي..
فجــأة صحيت ع الآهه في صوتك..
سرقت حلمي.. صورة موتك..
ماتت ف عنيا الضحكاية..
ولقيت دمعي هو رفيقي..
!!!

2010-07-06

لحظات نادرة ميزت يومي (أنا والنجمة.. وأخي)..

لم يميز ذلك اليوم شئ..
لا جديد فيه..
يشبه ما قبله.. وسيشبه ما بعده..
هذه هي حياتي التي اعتدت أن أعيشها..
لم أرغب في غيرها؛ ولم اتطلع لسواها...
إلا في لحظات مسروقة من أحلام جميلة.. أصبحت هي الأخرى في خبر كان!!
وأصبحت أنا لا أريد أن أفعل شيء في تلك الحياة سوى إنتظاري لنهايتها..
كالعادة.. كنت شاردة، حزينة، غائبة بعقلي عن كل ما ومن حولي..
إنتهيت من نشر الملابس،، وهممت بأن أغلق نافذة الشرفة
فجأة.. لمحتها.. فاستوقفتني.. ونظرت إليها مندهشة
يا الله.. منذ متى لم أرى واحدة؟!
مر وقت طويل جدااا..
يا لجمال هذه النجمة!.. سبحان من ابدعها..

أخذني التامل في حالها.. فذكرتني بحالي..
وجدتها مثلي وحيدة.. فكانت تتوسط السماء بمفردها...لا نجوم أخرى.. لا قمر.. ولا كواكب
كانت السماء الصافية.. وهي .. فقط
مثلي هي.. تقف صديقة لوحدتها.. وترى في عزلتها كل الكون من حولها
حتما لها طريقتها الخاصة أيضا في النظر لهذا العالم العجيب..
ثم تغير تفكيري فجأة.. لأدرك كم نختلف أنا وهي
أيقنت الفرق الجوهري بيني وبينها..
ياربي كيف ظلمتها؟! هي لا تشبهني مطلقا..
إنها تقف لتضيء كل هذا الكون بنورها،، وتتألق بسحرها فتضفي على الكون جمالا..
أما أنا.. فانطفأ نوري وانطفأت كل الأنوار من حولي..
يكفي صفاء سمائها وطهرها.. وكدر أرضي بشتى أنواع الحزن والظلم!!

أخذت الأفكار تتزاحم في عقلي..
وتذكرت من أفتقدهم فانتفض قلبي من ألم الفقد والحنين القاتل..
وصل حزني لذروته.. جرت الدموع في عينيّ.. وعاودتني شيخوختي التي دائما ما تداهمني في مثل هذه الأوقات..
وفي غمرة هذه اللحظات القاسية..
فاجأني أخي الصغير بشغبه وجلبته وهو يدخل مندفعا الى الشرفة..
فوجهت إليه اللوم على رجفتي..
وعدت الى تأملاتي..

مرت دقائق..
والتفتّ عفوا.. فوجدت أخي لم يرحل!.
كان واقفا في مكانه.. ناظرا اليّ في هدوء.. وعيناه البريئتان تسألاني في حيرة..
بماذا تفكرين لتكوني دائما حزينة هكذا؟!..
إبتسمت له.. ومددت له يدي ليقترب..
وضعته أمامي وحاوطته بذراعي.. ووجهت وجهه بيدي نحو النجمة..
فصاح بسعادة بالغة:
- اللــــه!!
أضحكني صوته البرئ.. وسألته:
- من إمتى مشفتش نجمة؟
فجاء رده مسرعا:
- يااااااااه من زمااااااااااااااااان..
ضحكت مرة أخرى..
ساد الصمت لدقائق.. ثم قطعه هو بكلماته البريئة:
- ايه ده؟ دي لوحدها يا منى، نازل ادور على نجمة تاني في السما كلها مش لاقي..
ضحكت طوييييييلا وضممته إليّ اكثر.. وانا اتعجب من تفكيره المشابه..
- اه يا محمود لوحدها..
سكت قليلا.. ثم هتف قائلاَ..
- ع فكرة ممكن يكون في حواليها نجوم كتييير بس احنا مش شايفينهم..
- اكييييييييييييد،، صح كلامك..
- وممكن يكون في كمان حواليها اجسام بقى فضائية ونيازك والحاجات التانية دي، مش فاكر اسمها..
- هههههههه قصدك شهب؟؟
- لأ، مش شهب لأ..
- امممم،، مذنبات؟؟
- اااااااايوة صح مذنبات..
ضحكت مرة أخرى..
وعاااد الصمت..
فجأة وجدته يهرب من حضني ويلتف إليّ قائلا:
- منى.. تعرفي مذنب هالي؟؟
- اه فاكرة اسمه تقريبا خدناه زمااان.. بس مش فاكرة حاجة عنه..
- عارفة؟ مذنب هالي ده بيظهر في السما كل 76 سنة مرة..
- ياااااه بجد؟ كل ده؟
- اااااه كل ده
- ها، وايه كمان؟
- ده بقى لما بييجي الناس كلهم بينزلو يتفرجو ويخربو الدُنيا ويحتفلو بقى ويغنو و ...........

أدخلته من النافذة وهو مستمر في الكلام،، وأكملت بدوري ضاحكة وأنا أغلقها..
- اااه ويرقصو ويهيصو ههههههههه
- اه والله بجد..
- مصدقاك.. ياحبيبي..

تحولت ضحكاتي وكلماته إلى إبتسامة حانية متبادلة بيننا..
شعرت لأخي الصغير المشاكس بالامتنان لأنه أنقذني من نفسي وآنسني بوجوده معي ولو للحظات قليلة..
ضممته.. طبعت قبلة على جبينه وربتّ على كتفيه، وتركته ليكمل لعبه ويتابع المباريات التي يحبها..

ومضيت أنا.. مبتسمة.. والدموع تترقرق في عينيّ..
أحمل في قلبي مشاعر عجيبة متناقضة..
توضأت.. ثم ذهبت للصلاة.. وناجيت ربي اسأله صلاح حالي وذهاب همي وكل من أحب..
ثم إحتضنت عروستي الصغيرة..
وذهبت معها إلى فراشي لأبدأ توسلاتي اليومية للنوم بأن يزور عينايّ ويريح عقلي ولو قليلاً..
وحمدت الله لأني وجدت في نهاية هذا اليوم على غير العادة.. شيء ميّزه!!

2010-06-21

سلام ع العرب



سلام ع العرب صغار أو كبار
سلام ع القضية وصنع القرار
بنفس الرواية ونفس الشعار
بنفس السيناريو ونفس الحوار
سمعنا استغاثة وصوت انفجار
ودم وخراب وقتلى ونااار..
عروبة صايبها الألم والدمار
كرامة وأمة في حالة انهيار
وايه ردنا اما كان لينا تار؟؟
حاربنا ف بعض.. عكسنا المسار..
خذلنا وطننا والخرس كان خيار..
نسينا المهمة.. نسينا العمار
وبعنا القضية.. قتلنا النهار..
ومن وسط القيود والاسوار
ومن بعد موت وصمت وعار..
بنصحى ثواني ف ظلامك يا دار
ونسأل بقلب انفطررر ومحتاااااار...
بشجب.. وادانة.. وباستنكار
وقمة بتقلب خناقة وشجار..
هتصحى العروبة وننهي الحصار؟؟!!

2010-06-12

آسفة يا أمي

آسفة يا أمي..
آسفة يا أمي أنا هبعد عنك
آسفة بقولها بجد وربك..
مش هبني أنا حلمي على أرضك
مش هتجوز.. ولا أربي ولاد تاني ف حضنك!!..
مش قادرة أجاريكي ولا أسايرك
عايشة ف ماضي بيحكيلي مجدك..
بهرب من عجزي ومن وهنك
من واقع بيصور غلبك..
مش قابلة أتكيف مع شعبك
مش بستوعب حتى حضارتك!..
مش بعرف أتذوق فنك
ولا بضحك مرة على نكتك
ولا بستطعم خفة دمك..
ولا بتحمس اشجع لعبك
ولا غاوية اتفرج على رقصك!!..
كنتي ف دمي..
كنتي ف دمي وكنت بحبك..
لسة بحبك.. بس بقولك
انه معدش يطمن حُبك!!
مقهورة يا أمي وبحسك
نار وبتسري في دمي باسمك..
بقى يقتلني منظر علمك..
لونه الأحمر شايفاه ذُلك
دم يلطخ صورة نسرك..
لونه الأبيض كدّره حزنك..
والأسود بقى هو حقيقتك!!..
شايفة يا أمي..
شايفة يا أمي أنا ايد بتهدك
ايد بتدس السم ف حلقك..
وولادك كانوا قوة تشدك
دلوقتي ف صراع على نهبك..
واعدائك انشغلوا ف سيرتك
واتفقوا معاهم على نهشك..
عجباهم الفرجة على فقرك
ضاحكين منهم.. منا.. ومنك..
من خيبة أمة بحالها وخيبتك!!..
سامحي يا أمي..
سامحي يا أمي على عيني أفارقك
على عيني أودع دفا شمسك..
بس ده غصبن عني وعنك
مش بارادتي أو بارادتك..
صعب عليا أحس بضعفك..
ولو أستحمل وجعي ف قربك؛
طاب أعيش ازاي جواكي وضدك؟!!
راح أمشي وطيفي لسة ف ضلك..
ودموعي بترويلك زرعك!!
هفضل أحبك.. هفضل بنتك..
وأدعيلك بقى ربي يساعدك
ويرجعلك.. سابق عهدك..
آسفة يا أمي أنا هبعد عنك
آسفة يا أمي أنا هبعد عنك...

2010-04-24

ناقوس الفراق...

مازال الصوت يتردد..
في قلبي وعقلي ودياري...
ويدق بناقوس فراق..
يعطي ببعادٍ إنذارِ...
يهزأ ببارقةِ أمل..
رفعت بالأمنية شعار...
جاءت وضعيف موقفها..
كالثلج محـــــاط بالنارِ...
يسلب من قلبي ذا الحلم ..
فأفيق وحولي الأسوار...
وطوفان الخوف يغرقني..
يعلن وسط الكون دماري...
مات أخيرا ذاك القلب..
لم يجرؤ على أخذ قرار...
لم يفلح أبدا في العيش..
لم يكشف كل الأسرار...
لابد وحتما من لحظة..
يستسلم فيها وينهار...
حضرت في الوقت نهايته..
وأخيرا قطع المشوار...
فسلام ياقلبي عليك..
ووداع دفتر أشعاري...


2010-04-11

ياما نفسي!!




ياما نفسي أوصل يأسي ده لأقرب مطار
ياما نفسي أودع قسوته
أقوى كتيير عن قوته
لا أستنى في يوم رجعته
ولا مني يستنى انتظار
ياما نفسي أوصل يأسي ده لأقرب مطار

ياما نفسي الخوف من قلبي ده يرحل بقى
ياما نفسي لو مرة أبعده عن سكتي
لو مرة ينسى ينحشر في قصتي
لا أحس بيه وأنا عايشة وحدي في غربتي
ولا أحس بيه لما تحين ساعة اللقا
ياما نفسي الخوف من قلبي ده يرحل بقى

ياما نفسي أسكن جوه سحابة.. في قلب بيت
بيطل شباكه على اسراب حمام
وابص منه ع الفضا القاه بياض.. لون السلام
افرح قوي.. واسمع حكاوي لجدتي قبل ما انام
واما النسيم يلمسلي قلبي الاقيني صحيت
ياما نفسي أسكن جوه سحابة.. في قلب بيت

كان نفسي احلامي متكنش ساكنة سطور
كان نفسي متكنش كلام ع الورق
كان نفسي المسها بقلبي اللي اتحرق
يتحقق ليا حلم.. الاقي غيره بدأ..
يفنيلي حزني ويتولد مكانه سرور....
كان نفسي احلامي متكنش ساكنة سطور...

2010-04-09

حالة وفاة..


مل الأمل!! سئم الحياة..
حكى حكايته بألف آآآه..
كان زار قلب بيترجاه..
كان قلب ميت.. جه حياه..
حياة جميلة.. كانت مناه..
من جرح عمره خلاص شفاه..
فرح الامل انه دواه..
حس بجد بقيمته معاه..
وصل لفوووق.. عليت سماه..
بعد الوصول.. في لحظة تاه..
فجأة انكسر طوق النجاة..
وصل الخوف للقلب.. نداه..
من تاني مات.. الخوف نهاه..
دور الأمل انه.. عمااااه
سجل بدايته.. في منتهاه!!
وفي الأمل.. لسة حياة؟؟
حتى الأمل.. يأسه ملاه!!
وحالته كانت صعبة.. ياااااه
حالة إنكسار..
حالة ضياع..
حالة وفاة..

ع الدنيا 100 مليون سلام!!


علمني حاجات قبل متمشي..
علمني ازاي انطق.. علمني الكلام..
علمني ازاي امنع قلبي
ينداس عليه وسط الزحام..
علمني وقلي ازاي اعيش
في زمن الكدب والاوهام..
علمني اعيش بس لنفسي
قلي الحب يابنتي حرام..
قلي اقوي ولا تحسي
علمني اني اتحدى الايام..
علمني ابيع.. اهجر.. وانسى
ولاعمري يوم من نفسي اتلام..
علمني ازاي اهزم خوفي
واواجهه في لحظة الانتقام..
علمني ارتاح ولا اتعبشي
علمني انام.. انا نفسي انام..
لا.. علمني اصحى ولا انمشي
عشان اهرب من شوف الاحلام..
خبيني ياحبيبي جوايا..
ولوحدي اعيش وسط الظلام..
علمني يا آبه اسكت وارحَل..
ع الدنيا 100 مليون سلام..

2010-04-08

مواجهة!!



لو يوم حسيت براحة..
ونام شوية عذابي..
بيصحى مكانه يأسي
وخوفي ع أحبابي..
يخبط.. أجري.. أستخبى..
مفتحش...... يكسر بابي!!
يخنقني كل ثانية..
ويصر آخد عقابي..
يواجهني بالحقيقة..
ويقولي بلاش تتغابي..
وأقوله حرام.. دقيقة..
متضيعليش شبابي..
لو كان ضاع من حقيقتي..
سيبني أعيشه في سرابي..
سيبني أعيشه ف سرابي!!

2010-03-29

القصة..... باختصار



أًصل القصة... وباختصار..
قصة خيبة وانهيار..
قصة فشل... قصة دمار..
قصة اسد هزمه.. حمار!!
قصة الصمت اما يخلي التلج ناار..
بركان ومستني انفجااار...
انين بيحرق في القلوب..
صرخة بتدوي في الفضا..
وصداها يخبط في الجدار..
اصوات كتيرة بتتسمع..
وكلام بقى مجرد.. شعار..
موجة مخدتش القرار..
مش عارفة تتحدى التيار..
وسفينة هايمة في البحور.. من غير بحّار..
مش قادرة تعكس المسار..
ركابها ملوا الانتظار..
عميوا من كتر الضلام
اشتاقوا يطلع النهار..
تعبوا من كتر الخرس
اتمنوا يتخلق الحوار..
اتخنقوا من كتر القيود
امتى هتتهد الأسوار؟..
امتى نفوق بقى ونختار؟..
امتى هنترتب صفوف؟..
امتى هنجتاز الحدود....
وساعتها ينفك الحصار؟!!!

نفس الصوت


نفس الصوت...
لما بينده..
وبيتحرك وسط جمود...
نادى سنين..
نادى وكان الرد سكوت...
ناس نايمين..
مبيصحوش غير بعد الموت..
كلام مكتوب.. صوات وانين..
شعارات، صخب..
وصراخ مكبوت..
لسّاكي عايشة يافلسطين..
لسة ترابك دهب وياقوت..
لسّاني يطويني الحنين...
بدعيلك مهما العمر يفوت...
يرفع رايات المسلمين...
شمسك تزيح عتمة سنين..
وف يوم قريب القدس تعود...

2010-02-25

حلاوة روح!!

لحظة بترسم آخر بسمة قبل الموت
لحظة لما الحق بينطق بعد سكوت
لحظة يرفرف فيها بجناحه طير مدبوح...
بنسميها حلاوة روح..
بعد مايكسر قلب برئ كتر الجرح
بعد مايقسى..
بعد ماينسى ازاي بيكون طعم الفرح
فجأة ينور يأسه أمل.. من غير شرح
يدي ويدي ..
وبطيبته ياما يداوي جروح...
ويعيش بس حلاوة روح..

لما بتظهر المحروسة في اصعب صورة
لما تكون ناسها شقيانة ومقهورة
في عز المها تلعب كورة.. تقوم منصورة!!
يهيِص أولادها ويفرحوا من بعد النوح...
لازم تبقى حلاوة روح..
نعمة كبيرة أكيد... سموها النسيان
وبلاها مكنش يعيش لحظة انسان
علشان أكمل.. بتلازمني في كل مكان
ناسية الجرح.. ناسية الظلم..
ناسية الفرح.. ناسية الحزن..
ناسية الصمت وحتى البوح...
أنا بس فاكرة.. حلاوة الروح!!!

حكاية بنت


كا(ن)ت بنت جت للدنيا دي..
من غير متدّبر..
حســـــــــــــــــاسة...
بأقل شئ لازم بتتأثر..
تعبت قوي..
من أحاسيسها دايما بتتدمر..
والناس كتير على قلبها..
تتصعب..وتتذمر!!
ليه ياحببتي حنينة؟!
ليه عقلك ده صغير؟!
اللي يعيش بينا هنا..
لازمله يتجبر!!
ويقوى لجل مايشتكي..
م الخوف وما يقشعر!!
اللي يكون بالشكل ده
ضروري يتغير!
شَبٍت ولسة الطَيٍبَة..
بالحب تتعمر..
واست وشالت ياما هموم..
وهي تتعثر..
ويزيد عليها وجع القلب..
مكنتش تتصور!!
سجدت وتدعي كتير يارب..
قلبي ده يتحجر!!!
إحساسه ليه بيدمره؟
ده صعب يتفسر!
الحب والخير يتعبه؟!!
ويحن..... يتكسر؟!!!
جَه يوم وحبت تقسى فيه..
لكن جَه متأخر..
مكتوب ومتقدر..
كان عمرها قصير..
ماتــــــــــــــــــت..
قتلها قلبها!!
ياعيني ع المنظر!

2010-01-15

بتحدى نفسي!!




أيام كتير فيها أنجرح وأتعب قوي
وأحس قلبي بينعصر، وكأنه جرح بيتكوي
أحزاني دايما تتولد، وكل فرحة بتنطوي
ببقى ضعيفة وبنكسر.... وفي قمة عجزي...

فجأة ألاقيني بتحدى نفسي...
وأقولها عيشي الأمل مهما بغدر الزمان تحسي...
ولو في يوم قسيوا البشر.. أوعي ياروحي في لحظة تقسي...

بعيش وأنا أسرح وأفتكر في حاجات كتير تديني صبر
ياما قلوب بتتقتل.. فجأة بتصحى وتتولد وكأنه سحر
والوردة تشرب م التراب وفي النهاية.. بتدي عطر
والليل سواده مهما يطول.. لازم يكون من بعده فجر
هانت يا نفسي...
مهما الجراح كانت كتير أكيد هتنسي...

لازم كدة.. أتحدى نفسي
وأقولها عيشي الأمل مهما بغدر الزمان تحسي..
ولو في يوم قسيوا البشر..
أوعي ياروحي في لحظة تقسي...

بصمد عشان يجيلي يوم فيه أتعلم..
لو عشت عمري أصرخ وأبكي وأتألم..
هتضيع سنين وأنا بفكر وأتندم...
وفي ثانية واحدة... مش هلقى نفسي...

علشان كدة.. بتحدى نفسي..
وأقولها عيشي الأمل مهما بغدر الزمان تحسي..

ولو في يوم قسيوا البشر

أوعي ياروحي في لحظة تقسي...

على طول وانا اواسي في نفسي واقولها متزعليش

واسبق بضحكتي جرحي ومهما اتظلم ميهمنيش

ربي وعالم شكوتي ويوم متخنق مبيسيبنيش

ليه القلق؟ هو معايا ولو كل الكون معيش

خلاص يانفسي... مفيش قلق.. حالا هترسي

..دايما كدة هتحدى نفسي...

وهقولها عيشي الامل مهما بغدر الزمان تحسي

ولو في يوم قسيوا البشر..
أوعي ياروحي في لحظة تقسي...