لحظة بترسم آخر بسمة قبل الموت
لحظة لما الحق بينطق بعد سكوت
لحظة يرفرف فيها بجناحه طير مدبوح...
بنسميها حلاوة روح..
بعد مايكسر قلب برئ كتر الجرح
بعد مايقسى..
بعد ماينسى ازاي بيكون طعم الفرح
فجأة ينور يأسه أمل.. من غير شرح
يدي ويدي ..
وبطيبته ياما يداوي جروح...
ويعيش بس حلاوة روح..
لما بتظهر المحروسة في اصعب صورة
لما تكون ناسها شقيانة ومقهورة
في عز المها تلعب كورة.. تقوم منصورة!!
يهيِص أولادها ويفرحوا من بعد النوح...
لازم تبقى حلاوة روح..
نعمة كبيرة أكيد... سموها النسيان
وبلاها مكنش يعيش لحظة انسان
علشان أكمل.. بتلازمني في كل مكان
ناسية الجرح.. ناسية الظلم..
ناسية الفرح.. ناسية الحزن..
ناسية الصمت وحتى البوح...
أنا بس فاكرة.. حلاوة الروح!!!
جميل ما صور قلمك
ردحذفعشت و عاش قلمك