إليكـِ حلاوة روح في ذكراكـِ ... حـــرة أنــا

حرة أنا...

حررني طول الصمت من قيد الكلام

مهوْ حرام..

آجي أشاور ع اللي راح؛

واقول جرح.. يطلع جريح

كذب الكلام بتجنبه (بِسكوت صريح)

بتقولي صوتي بيوحشك؟

أنا عارفة.. حقِكـ تحزني

بس أحزني متطمنة !

حرة أنا...

متحررة من كذب أحلامي..

بعرفها وهم، ولو اشوفها قدامي

بقفل عنيا..

أوعي ف يوم لو ترجعي تخافي عليا؛

تبيني خوفك..

وقبل ما أشوفك

بدليه لو تقدري بفرح وغنا !

حرة أنا...

حررت عقلي من ظنوني..

لو شفتي يوم الحزن ف عيوني

متبصلوش نظرة حنان،

لا تشفقي، ولا تسأليه

اقسي عليه،

بصيله نظرة من غضب

أو حتى نظرة بالوداع يمكن بجد تودعيه

احميني منه بحضن منك..

وعشان ف يوم مكبرش على حضنك..

متحسبيش ف الهم عمري كام سنة !

حرة أنا...

بتخافي ليه من غربتي وانا غربتي طوعي؟

وليه تصحيلي اللي فات؟

متنيمي دموعي !

متعلميني الضحكة من قلبي..

متقربي رجوعي !

ساعديني لحسن بعدنا طول..

أو جربي تقابليني م الاول..

يمكن نصالح بعضنا !

حرة أنا

 !!