ورق الوان مليان شخابيط
وحروف وكلام عن شر وخير
عن دقة حب لقلب كبير
عن حزن وحلم وجرح غويط!
ورق الوان مليان شخابيط...
ورق يحكي عن دنيا زمان
ودنيا جديدة ملهاش امان
فيها صاحب خان...ودم هان
وفيها الطيب يبقى عبيط!
ورق الوان مليان شخابيط...
وقلم طاير زي العصفور
يرسم سما ومية وزهور
ميقفش في زحمة ولا في مرور
ملقاش ورق.. يرسم ع الحيط!
ورق الوان مليان شخابيط...
وضحكة صافية لبنوتة
بضفيرة طويلة ومعقودة
وفيونكة حمرا مربوطة
براءتها حكاية وحدوتة
بتحب الهيصة والتزييط!
ورق الوان مليان شخابيط...
وبلد تعبانة ومهمومة
شبابها ضايعة وملخومة
وناسها صبحت مزكومة
ورئيسها فالح في التنطيط!
ورق الوان مليان شخابيط...
ورق الوان مليان شخابيط...
وسبت نازل م البلكونة
فيه لبانه كبيرة وبلونة
جايزة للبنت الشعنونة
علشان مضربتش القطاقيط!
ورق الوان مليان شخابيط...
ورق مكتوب اقرا وذاكر
ده ورق للخايب والشاطر
لو مفهمتش خليك فاكر
ده مهوش شعر ولا خواطر!
ده ورق الوان مليان شخابيط...
مش قادره اقولك بجد قد ايه جميل
ردحذفحاجه روعه بجد كلام جميل و بنوته اجمل كاتباه ربنا يكرمك يا منونه و يحققلك كل اللي تتمنيه يااااارب
وانا مش قادرة اقولك قد ايه تشجيعك وطلتك دي جمييييييييلة
ردحذفربنا يخليكي يارب يا سارة ويسعد ايامك ويبعد عنك كل شر ويحلي حياتك كلها
بجد بجد تحفه يا منون بجد ويالا عاوزين نشوف جديدك بقى
ردحذفالى الامام ياقمر
جامدة جدا
ردحذفربنا يخليكي ياسوما يارب
ردحذفانتي اللي جامدة يا ريهام والله
ردحذفمتحرمش يارب